СВР Скопје поднесе кривична пријава до надлежното Јавното обвинителство во Скопје против Н.А. (30) и Ф.Н. (30) двајцата од Скопје, поради основи на сомневање дека за време на одржување на протестите на 13 април учествувале во толпа при што фрлале тврди предмети, го кршеле инвентарот и извршиле други оштетување на надворешноста и внатрешниот дел на објектот на народната канцеларија на Претседателот на РМ, предизвикувајќи значителна материјална штета со што сториле кривично дело „Учество во толпа што ќе изврши кривично дело“, соопшти МВР.
За стореното кривично дело, од страна на Судија на претходна постапка на двајцата пријавени, кои и досега се кривично пријавувани за кривични дела проследени со насилство, им е изречена мерка-домашен притвор во траење од по осум дена.
Во соопштението се наведува дека двајцата биле во толпата која влегла во Народната канцеларија на Претседателот и која го оштетила и го изнесувала инвентарот на улицата. Двајцата, за едно со уште едно, за МВР непознато лице потоа го запалиле.
– Откако кордонот од полициски службеници започнале да ја потиснуваат толпата во правец на Министерството за правда, толпата продолжила да фрла со разни тврди предмети при што е оштетен објектот на Министерството за правда и е повредено едно лице-новинар на медиумот “Плусинфо“. При поттиснувањето на толпата од страна на УПС од ЕБР, лишени од слобода се 13 лица, меѓу кои и двајцата кривичнопријавени и истите биле однесени во ПС ОН Центар за понатамошна постапка, се вели во соопштението.
Во дадените изјави пред полициските службеници, пријавените, како и останатите 11 приведени во целост негираа каква било поврзаност со кривичното дело, односно дека биле присутни на протестот и дека мирно протестирале, што не соодејствува со утврдената фактичка сосотојба од страна на ПС ОН „Центар“, за што против 11 лица се поднесени барања за поведување на прекршочна постапка по член 14 и 15 од ЗППЈРМ, велат од МВР.