Министерството за здравство ја објави анализата на вакцинирани, од позитивни случаи со Ковид 19, во период од 6 август заклучно со 18 ноември 2021 година. Притоа за вакцинирани се сметаат лицата кои се вакцинирани со две дози и поминале најмалку 14 дена од примање на втората доза од вакцината.
Во период од 06.08 до 18.11.2021 на територија на државата 53.682 граѓани имале позитивен  тест на Ковид 19. Од нив  31% биле целосно вакцинирани, односно 16.702 лица.
Голем е бројот на невакцинирани граѓани кои се заразиле со Ковид 19, констатираат од Министерството за здравство. Според статистиката за изминативе месеци, 36.980, граѓани, односно 69% од позитивните на Ковид 19 не биле вакцинирани.
Процентот на хоспитализирани лица кои се невакцинирани е исто така голем,информира Министерството за здравство. Од моментално 534 хоспитализирани пациенти, само 123 лица се целосно вакцинирани.
Смртноста кај невакцинираните е драстично поголема, покажува анализата. Во период од 6.08 до 18.11.2021 на територија на државата од вкупниот број починати, 80% биле невакцинирани, а 20% од починатите примиле вакцина. Според анализите починатите имале повеќе комбинирани хронични заболувања.
Министерството за здравство укажува на важноста на вакцинација, секоја вакцина која ја имаме на располагање е безбедна. Апелираме граѓаните да се вакцинираат, само така ќе дојдеме до колективен имунитет и ќе спречиме ширење на мутации на СарсКоВ2.