Министерството за здравство (МЗ) соопшти дека Институтот за јавно здравје (ИЈЗ) во денеска доставениот извештај пријави починато дете на шест месечна возраст, кое во регистарот „Мој термин“ е заведено дека починало на 03.01.2022 година.
Според податоците добиени од Клиниката за детска хирургија, станува збор за дете со вродена аномалија на черепот. Доенчето е примено на Клиниката за неврохирургија заради оперативна интервенција. По добивање на ковид позитивен тест, детето е ставено во изолација на респираторна машина и е ординирана соодветна терапија. Со цел постоперативно третирање детето е хоспитализирано на Клиника за детска хирургија.
По континуиран период на лоша општа состојба (со настаната респираторна и хепатална инсуфициенција и тестови со наод во прилог на дисеминиранта интраваскуларна коагулопатија) во текот на престојот на Клиниката, на 03.01.2022 доаѓа до дополнително влошување на општата состојба. Лекарите на Клиниката ги преземаа сите мерки за интензивно лекување и реанимација, но и покрај тоа за жал малиот пациент заврши летално, информираат од Министерството.