Нови два смртни случаја на Клиниката за инфективни болести и фебрилни состојби и 46 нови случаи на заболени од коронавирус во изминатото деноноќие, информира Министерството за здравство. Едниот починат пациент, чиј резултат од тестот за ковид-19 се чека, е од Куманово, на 70 годишна возраст, и имал и коморбидитети (хипертензија и срцева слабост). Вториот, пак, е од село од околината на тетовско на возраст од 68 години кој имал артериска хипетензија.

Во изминатите 24 часа, регистрирани се 46 нови случаи на коронавирус во земјата. По градови: Скопје – 13, Куманово – 23, Дебар – 2, Прилеп – 1, Тетово – 2, Велес – 2, Гостивар – 1, Гевгелија – 2. Со нив, вкупната бројка на дијагностицирани пациенти со ковид-19 во земјава изнесува 430 лица, а според местото на живеење, пациенти со коронавирус досега се регистрирани во:

Скопје – 208
Куманово – 85
Дебар – 49
Штип – 15
Прилеп – 22
Тетово – 15
Струга – 9
Велес – 8
Битола – 4
Охрид – 3
Кавадарци – 2
Гостивар – 2
Гевглелија – 4
Струмица – 1
Крива Паланка – 2
Кочани – 1

Од Министерството за здравство информираат дека на Клиниката за инфективни болести и фебрилни состојби, со два контролни негативни теста на ковид-19, во текот на денешниот ден се испишани тројца пациенти во добра здравствена состојба.

Во изминатото деноноќие се направени 389 теста од кои 222 преку Институот за Јавно Здравје (ИЈЗ). Останатите се реализирани преку Ветеринарен факултет – 13, лабораторија „Авицена“ – 22, „Биотек“ – 20 и Филип Втори (Жан Митрев) – 112. Досега во земјата се направени 4.506 тестирања на ковид-19.

Министерството за здравство информира дека меѓу потврдените случаи од Куманово, има нови потврдени здравствени работници позитивни на ковид-19 од болницата во Куманово. Подетални информации за нив се најавени на редовната прес-конференција на министерот Филипче во 16 часот.