Иако здравствената состојба на 24 – годишниот пациент била сериозна, тој побарал да биде испишан од болницата.

Меѓу 36-те починати пациенти од Ковид – 19 во денешната статистика е и 24 – годишно момче од Ресен. Тој утрово починал во Клиничката болница, каде таму бил примен пред три дена. Министерството за здравство информираше дека на 24 август тој бил примен на инфективното одделение во битолската болница како суспектен на вирусот во тешка здравствена состојба, со ниска сатурација и отежнато дишење, има масивна бронхопневмнонија. Иако на него му била дадена терапија и бил ставен на кислородна поддршка, пациентот, како што наведуваат од министерството, одбил да остане на болничко лекување. По ова лекарите го запознале за неговата сериозна здравствена состојба, но тој побарал да биде пуштен на домашно лекување.

– По потпишана изјава дека си оди на сопствена одговорност, пациентот е испишан со препишана терапија која треба да ја прима во модуларната болница во Ресен. Следниот ден, на  25 август, пациентот е донесен од Општата болница Охрид за хоспитализација во Клиничката болница Битола. Веднаш хоспитализиран во тешка општа состојба со ниска сатурација, поставен на двојна кислородна поддршка, интензивна терапија, но и покрај тоа постојано му се влошува состојбата и паѓа сатурацијата. На 27 август утрото и покрај обидите на лекарите да го спасат, пациентот починал. Во системот не се заведени коморбидитети кај пациентот и тој не бил вакциниран, велат од министерството.

Инаку, момчето неодамна правело свадба, јави ММС, а се претпоставува дека се заразил од некој од гостите кои биле присутни на свадбата.