Поради загриженост за безбедноста на нашите кошаркари и членови на стручниот штаб по ужасното искуство на претходното гостување кај Работнички во Скопје кога кон нас беа фрлени стаклени шишиња, МЗТ Скопје Аеродром нема да го почне вечерашниот меч во „Градски парк“ се додека не се увериме дека организаторот ги исполнил сите безбедносни мерки предвидени во неговиот договор со МКФ пред стартот на Суперлигата, соопштуваат од МЗТ Скопје.
Тие додаваат дека нема да дозволат да бидат „ глинени гулаби подготвени за отстрел во сала која одамна е зрела за пензија и каде што сите клубови прифатија да ја доиграат сезоната само ако центарци ги отстранат опасносните пред кои се изложени гостинските екипи“.
Кошаркарите во сино-бела опрема нема да истрчаат на паркетот ако во „Градски парк “ нема доволен број професионали редари, ако ложата над нивнта клупа не биде празна и ако навивачите на домашниот тим се сметени единствено на страната од нивната трибина.
Кошаркарите на МЗТ Скопје ќе го напуштат паркетот при првиот инцидент.
„Сето ова не е наш хир или самоволие, туку станува збор само за дел од обврските кои центарци ги преземаа за да може да играат во „Градски парк“, поради што мора целосно да ги исполнат. Истовремено од челниците на МКФ бараме да го информираат делегатот на вечерашната средба за сите овие детали кои домаќинот мора да ги исполни и да не се дозволи потфрлање на топката додека сите на паркетот не бидат максимално безбедни.