Договорот беше потпишан од тогашниот претседател на Република Македонија, Борис Трајковски, поранешниот претседател на ВМРО-ДПМНЕ и премиер Љубчо Георгиевски, претседателот на ПДП Имер Имери и тогашните претседатели на СДСМ Бранко Црвенковски и на ДПА Арбен Џафери.
Потписници на договорот, во својство на гаранти, беа и специјалните претставници на ЕУ и САД, Франсоа Леотар и Џејмс Пердју, кои учествуваа во преговорите. Покрај потписниците во разговорите учествуваа и Хавиер Солана, тогашен висок претставник на ЕУ за безбедносна и надворешна политика и Питер Фејт, претставник на САД, како и повеќе правни експерти, меѓу кои професорите Владо Поповски и Љубомир Фрчковски.
Преговорите биле мошне напнати, бидејќи се одвивале паралелно со вооружени непријателства помеѓу двете страни. Во неколку наврати имаше ризик преговорите да бидат прекинати и конфликтот да ескалира во отворена граѓанска војна.
Секретаријат за спроведување на Рамковниот договор, денес на Попова Шапка организираше работна конференција „Охридски договор – предизвик и гаранција за интеграција“. Поканети беа претседателите на партии, амбасадори, функционери во извршната и во законодавната власт, а поканети се и потписниците на договорот, поранешните лидери на СДСМ и на ВМРО-ДПМНЕ Бранко Црвенковски и Љубчо Георгиевски.
Поканет е и холандскиот дипломат Питер Фејт од Европскиот институт за мир. Тој беше присутен во земјава за време на кризата во 20о1 година.
Неговиот институт, по нарачка на Секетаријатот за спроведување на договорот, подготви извештај за спроведувањето и за она што треба да се направи како обврска од потписот ставен во Охрид пред 15 години. Минатата година требаше да се организира конференција на која требаше да се разговара за овој договор но средбата беше откажана поради политичката криза во нашата земја.