Шпанскиот министер за надворешни работи Жозеп Борел ја отрфли идејата дека неговата земја е соочена со “масoвна имиграција” и додаде дека на европскиот континент му е потребна “свежа крв”.
Оваа година Шпанија стана првата порта преку која влегуваат нелегалните мигранти во ЕУ а Италија е втората.
Од јануари годинава 20.992 нелегални мигранти влегле во Шпанија по морски пат а 304 се удавиле за време на патот преку Медитеранот, објави на 25 јули Меѓународната организација за миграции. Истовремено, бројот на мигрантите што минуваа по рутата преку Либија и Италија падна за 80 отсто.
На морската рута треба да се додадат и мигранти што доаѓаат по копно: 602 мигранти успеале да влезат во шпанската енклава Цеута во Мароко скокајќи преку метална ограда и фрлајќи камења кон полицијата.
– Разбирам дека ова ја шокира јавноста која стравува од неуредниот карактер на имиграција, призна шпанскиот министер.
Но додаде дека за 600 луѓе не може да се каже дека станува збор за “масoвна имиграција” ако се спореди со 1,3 милиони сириски бегалци што го прими Јордан, изјави министерот.
Борел вчера имаше прес конференција со неговиот колега од Јордан Ајман Сафади:
– Не велам дека не треба да се имаат на ум овие бројки но годинава зборуваме за 20.000 мигранти за земја која има 40 милиони жители. Тоа не е масoвна имиграција, рече Борел.
Според него, зборот “масoвно” е банализиран а работите треба да се оценат според нивната вистинска мерка.
– Демографската еволуција на Европа покажува дека ако не сакаме да се претвориме во континент на старци, нам ни треба свежа крв а таа крв се чини не доаѓа од нашиот капацитет за раѓање, додаде Борел.