Денеска попладне во Мала Речица продолжуваат консултациите на претседателството на партија околу одлуката со кого ќе коалицираат во составување на мнозинство за формирање на нова влада.
Вчера, по 10-часовни разговори, партијата на Али Ахмети не успеа да ги усогласи ставовите и реши разговорите да продолжат.
Лидерот, Али Ахмети, по завршување на состанокот во Мала Речица, кусо изјави дека сите опции се во игра.
„Нема договор со кого одиме во коалиција, се разгледуваат сите опции за што е можно подобра одлука во корист на Албанците, Македонците, Србите, Ромите, Власите. Се разгледуваат сите опции..“, изјави Ахмети.
За време на средбата во Мала Речица, тројца од потпретседателите, Невзат Бејта, Теута Арифи и Изет Меџити, го напуштија состанокот и заминаа во седиштето на СДСМ за да го запознаат лидерот на партијата, Зоран Заев, со условите на ДУИ за коалицирање. Портпаролот на партијата, Бујар Османи, демантираше дека има раскол во ДУИ, туку рече дека има различни аргументи по однос на опциите за можна коалиција.
Денеска на полноќ истекува рокот на Никола Груевски и ВМРО-ДПМНЕ да формираат влада. ДУИ е единствената шанса на Груевски за формирање влада. Ахмети и неговите најблиски соработници притискаат за влада со ВМРО-ДПМНЕ, но потпретседателстово даде силен отпор, како и најавите на дел од пратениците дека тие во Собранието нема да притиснат зелено копче за таквата влада.