Хозе Антонио Камачо е нов селектор на фудбалската репрезентација на Габон чија најголема звезда е Пјер Емерик Обамејанг. Легендарниот играч на Реал Мадрид постигна договор со челниците на габонската федерација кои од Шпанецот очекуваат успех на претстојниот Куп на африкански нации во јануари во 2017 година.
Камачо ќе добива 800.000 евра годишно, сума што треба да ја дели со соработниците. Неговиот ангажман во Габон, сепак, е дочекан со изненадување во фудбалската јавност по два основа. Како фактори се истакнуваат големиот временски период (три години) што мина од последниот работен однос како кормилар на Кина и непознавање на францускиот јазик.
Камачо во два наврата во кариерата ги предводеше Бенфика и Реал Мадрид, а беше на клупата и на Осасуна, Еспањол, Севилја, Рајо Валјекано.
Габон, инаку, е домаќин на африканскиот континентален турнир во 2017 година што ќе почне на 14 јануари и ќе трае до 5 февруари. Габонците ќе играат во групата А заедно со Буркина Фасо, Камерун и Гвинеа Бисао.