Двајца македонски државјани и еден турски вчера на граничниот премин Табановце се обиделе да изнесат 44.800 илјади евра. Парите биле скриени во термос за кафе и во кутија за шеќер, информираа од Царинската управа.
„На 23 март 2017 година на граничниот премин Табановце се пријави моторно возило со македонски регистарски таблици, управувано од македонски државјанин, со кој патувале уште двајца сопатници, еден македонски и еден турски државјанин. На прашањето од царинските службеници дали имаат нешто да пријават, само едниот сопатник – турскиот државјанин одговорил дека со себе носи 9.000 евра, а другите две лица одговориле дека немаат ништо за пријавување. При преглед на лицата и возилото, покрај уредно пријавените 9.000 евра, во предниот дел од возилото во термос за кафе царинските службеници пронајдоа 34.800 евра, а во кутија за шеќер сместена во фабричката преграда на десната врата уште 10.000 евра. Согласно законските прописи, на патникот му се вратени 10.000 евра кои нерезидент (во случајов турски државјанин) може слободно да ги изнесе од Македонија, а останатите 43.800 евра за кои немало никаков документ за потекло привремено се задржани. Царинската управа против сторителот започна соодветна постапка“, пишува во соопштението на царинската управа.
Возилото со кое управувал еден од македонските граѓани било со македонски регистарски таблици.
