Published: Saturday, December 2, 2017 12:11
Обилните дождови изминативе неколку денови, доведоа до излевање на реките и евакуација на населението на југот на Албанија, соопштија надлежните институции.
Евакуирани се повеќе од 100 семејства во близина на реката Вјоса, околу 120 километри југозападно од Тирана, соопшти албанското Министерство за одбрана.
Надлежните наведоа дека досега поплавени се 3.334 куќи, 3.016 хектари земјоделско земјиште, како и дека 23.000 луѓе немаат струја од вчера.
Во поплавите ширум Албанија загина еден човек, парализирани се пристаништата, а летовите од единствениот меѓународен аеродром во Тирана се сопрени.
Албанскиот премиер Еди Рама рече дека 6.400 спасувачи, полицајци и војници се борат со многу критичната ситуација.