„Кралот на земја“ е херој и на тврда подлога. Рафаел Надал (31) и овојпат го претвори њујоршкиот тениски комплекс во корида, го зададе решавачкиот удар и по третпат го понесе трофејот на Ју-Ес опен. До 16. гренслем во кариерата стигна по триумфот против Кевин Андерсон со 6:3, 6:3, 6:4 во финалето на 137. издание на турнирот и се доближи на три титули од Роџер Федерер.
„Неверојатни две недели. Во нив постојано го подигнував нивото на игра и на самодоверба и на крајот еве ме повторно со трофејот во Њујорк. Не постои подобар начин за мене за завршување на сезоната на гренслем турнири што и онака беше со премногу емоции од многу аспекти“, рече Надал по рутински одработеното финале против Јужноафриканецот.
Шпанското момче од Мајорка стана само шести играч во историјата со три победи на Флешинг Медоу по Роџер Федерер, Пит Сампрас, Џими Конорс, Џон Мекинро и Иван Лендл. Ако по прославата на неговиот 30. роденден постоеја сомнежи за правецот на неговата кариера и заговорите за можно скорешно пензионирање, ноќеска во Њујорк самиот даде демант на таквите конструкции и не дозволи изненадување какви ги имаше премногу во изминатите 14 дена.
„Пресреќен сум од начинот на кој играв, пресреќен сум од начинот на кој го менаџирав притисокот, пресреќен сум од начинот на севкупно натпреварување на турнирот. Дали играв подобро или полошо на моменти, сепак, натпреварувачкиот дух беше постојано присутен на многу позитивен начин“, истакна Шпанецот кој е убедливо прв на новата АТП листа.
Надал во ниту еден момент не се соочи со ситуација да загуби гем на сопствен сервис. Андерсон, пак, во ниту еден гем во кој бранеше почетен удар не освои повеќе од два поена. Точниот и презицен настап на Шпанецот го отсликува и дел од статистиката што укажува на само 11 неизнудени грешки наспроти 30 директни поени во два часа и 24 минути колку што траеше мечот за титулата. И особено доминантниот сервис по кој препушти само 15 поени за ново враќање во победничкиот круг по 20 години од првиот гренслем трофеј во Париз.
Меѓу 2005 година и 2014 година, Надал освојуваше барем по еден гренслем турнир во сезона. Низата беше прекината во 2015 година за да продолжи лани и оваа година. Долг период важеше за неприкосновен тениски владетел на земјена подлога што сè уште и важи. Биланс од 79 победи и само два пораза на Ролан Гарос ќе бидат тешко достижен за било кој играч меѓутоа кругот на фантастично делување, во меѓувреме, го прошири на сите подлоги. Во Њујорк ја освои четвртата гренслем титула на тврда подлога, а има две и на Вимблдон (трева) од 2008 година и од 2010 година како потврда на еден од најдобрите на сите времиња.
Ју-Ес опен – финале (м)
Надал (1., Шпанија) – Андерсон (28., Ј. Африка) 6:3, 6:3, 6:4