Пред утрешната рунда преговори за решавање на спорот со името во Виена до медијаторот метју Нимиц, министрите за надворешни работи на Македонија и Грција, Никола Димитров и Никос Коѕијас повторија дека сакаат да се најде компромис и конечно да се реши спорот.
Позицијата на Грција е сложено име со географска одредница, за севкупна употреба и промена на македонскиот Устав, додека Македонија смета дека прашањето треба да се реши преку меѓународен договор, а не со промена на највисокиот правен акт на државата и го отфрли предлогот што се појави во јавноста за слеано име, како недостоинствено решение, особено не непреведено.
– Името треба да биде сложено со географска одредница, со придавка и да разграничува дека не станува збор за грчката Македонија и да не содржи иредентистички елементи е ставот на официјална Атина, кој го изнесе шефот на грчката дипломатија Никос Коѕијас.
Повтори дека сложеноto име треба да важи за сите, за сите односи, односно и за внатрешноста, да биде изразено со меѓународниот договор потпишан во ОН и со промени во Уставот.
– Треба да најдеме сложено име што ќе ја изразува посебноста и географската позиција на оваа држава, а во исто време нема да навредува ниту една од двете страни, изјави Коѕијас, додавајќи дека уставната промена е неопходна не само бидејќи тоа е грчко барање и гаранција за Атина, туку и за внатрешни гаранции и за некоја идна влада, затоа што „следниот Груевски 2“ ќе излезе со обвинувања.
Коѕијас во обраќањето на промоцијата на книгата „Македонското прашање“ на Никос Мерѕос пред два дена отиде чекор натаму во коментирање на детали до преговорите, истакнувајќи дека не може да негира правото на една држава да го користи името Македонија, ниту јазикот кои како што рече постојат и мора да с енајде решение како ќе се употребуваат.
Шефот на македонската дипломатија Никола Димитров нагласи дека географската одредница е прифатлива, но за дистинкција од територијата во Грција, а не за обезличување на македонскиот јазик, народот и државата. Димитров повтори дека за македонската страна неприфатливо е слеано пишување на одредницата со името Македонија, а исто така предочи дека е неприфатливо и име без превод.
– Тој страв мора да биде покриен соодветно за воопшто ние да можеме да се отвориме за географска одредница. И тоа што јавно го соопштивме за географска одредница е врзано, односно не е безусловено. Исто така таа географска одредница не може да биде недостоинствена. Практично ова го нема во слеаното име, рече Димитров.
Димитров истакна дека од Виена нема очекувања, туку надеж.
– Се надевам дека ќе направиме напор да се придвижиме, да направиме исчекор, вели тој.
Тој најави дека Владата по виенската средба, ќе го свика државниот врв и лидерите на најголемите партии на лидерска средба.
Портпаролот на грчката Влада Димитрис Ѕанакопулос нагласи дека топката „сега е на теренот на соседите и оти треба да направат уште неколку чекори за да стигнеме до договор“.
– Сметам дека е факт оти има политичка волја и од двете страни, но сепак постојат прашања што не се едноставни, не се од технички карактер, а главното е прашањето за уставна ревизија за да се покрие предусловот на ерга омнес. вели портпаролот на грчката Влада.