Филмот „Врба“ на Милчо Манчевски ја освои наградата за најдобар филм во програмата Недела на режисерите на 40. издание на филмскиот фестивал „Фантаспорто“ во Порто, Португалија, еден од 20. водечки во светот. Наградата е именувана по легендарниот португалски режисер „Мануел де Оливеира“ .
Во соопштението до медиумите се наведува дека наградата на сцената во Порто, Манчевски ја посвети на извршниот продуцент на „Врба“, Ник Пауел, британската продуцентска легенда, кој почина лани во ноември, една недела по светската премиера на филмот.
„Убава награда во убав град. Мило ми е што „Врба“ го наоѓа патот до срцето на гледачите во повеќе земји“, изјави Манчевски за наградата.
Ова е третпат како Манчевски е лауреат на „Фантаспорто“ – во 2016 година доби Награда за кариера при што имаше и ретроспектива на неговите филмови, а во 2017 година „Бикини Мун“ ја освои специјалната награда на жирито во истата програма Недела на режисерите.
Минатата недела „Врба“ беше прикажан во главната конкуренција за награди на ФЕСТ во Белград, а од мај, филмот ќе игра на редовниот кинорепертоар во Србија.
„Врба“ по „Фантаспорто“ овој месец ќе има и американска премиера, во селекцијата за награди на фестивалот „Синеквест“ во Сан Хозе и Редвуд Сити, Калифорнија (3-15 март) еден од најстарите и најреномирани фестивали во САД, по што следуваат фестивалите во Софија и Истанбул. Минатиот месец, „Врба“ имаше премиера и во Нов Зеланд и доби награда за најдобар филм на камерниот фестивал за независни филмови во Велингтон.