Вториот пакет бескаматни кредити преку Развојната банка наречен „ковид 2“ веќе од среда ќе им биде достапен на микро, малите и средни компании погодени од корона-кризата во Македонија. Овој пакет, за разлика од претходниот, е пообемен и нема ограничување на дејностите кои може да аплицираат, а еден од условите за аплицирање е компаниите да имаат пад на приходите за 30 отсто.
Минималниот износ за одобрување на средства е 3.000 евра, а максималниот износ 90.000 евра. Кредитите се бескаматни, рокот на отплата е до три години со грејс период од 12 месеци, додека трошоците кон Развојната банка се сведени на нула. Кредитната линија е со вкупен износ од осум милиони евра што се обезбедени преку компензацискиот фонд на Јапонија.
Според министерката за финансии Нина Ангеловска, ова е значајна финансиска инјекција за микро, малите и средни претпријатија со цел да се сочува ликвидноста на компаниите и да се заштитат работните места.
„Линијата „ковид 2“ нуди поголема сума за бескаматни кредити од линијата „ковид 1“, но и поголем износ на поединечни кредити и она што е важно е дека ги опфаќа сите дејности погодени од кризата. Има олеснети услови и олеснет начин за аплицирање“, рече Ангеловска на денешната прес-конференција во Владата.
Аплицирањето ќе биде електронски, а документацијата за „ковид 2“ е речиси иста како и за првиот пакет „ковид 1“. Во соработка со Централниот регистар е договорено потребните документи од оваа институција да се издаваат бесплатно.
Јапонската амбасадорка во земјава Кеико Ханеда во видео обраќање изрази поддршка за мерките што ги презема Владата и надеж дека тие ќе помогнат на компаниите да продолжат да работат и да се сочуваат работните места.
„Сите земји се борат против коронавирусот и во овие тешки времиња треба заедно да работиме и да се подржуваме. Мило ми е што уште еднаш можеме да го потврдиме цврстото пријателство меѓу Северна Македонија и Јапонија“, порача Ханеда.
За првиот повик „ковид 1“ досега се одобрени средства за 254 компании со околу 3.000 вработени во вкупен износ од 2,2 милиони евра.
Вкупниот износ на средства што се даваат на располагање на компаниите со двата повика изнесува 13,7 милиони евра. Покрај ова, компаниите имаат на располагање и околу 50 милиони евра преку комерцијалните банки.