Комисијата за заразни болести на утрешниот состанок ќе разгледува нови мерки за спречување на ковид-19 кои директно ќе се однесуваат на невакцинираните граѓани, најави министерот за здравство, Венко Филипче во вечерашното гостување во Дневникот на ТВ Канал 5. Конкретни предлози, истакна тој, ќе бидат проследени до Владата. Новите рестрикции ќе се однесуваат на невакцинираните оти, како што нагласи, тие најмногу ги оптоварувале болниците.
Болничкиот систем во моментот е најмногу оптоварен со невакцинирани пациенти. Тоа дефинитивно не смееме да го толерираме понатаму. Доаѓа зимската сезона и време на настинки и други пациенти ќе го оптоваруваат дополнително болничкиот систем. Во услови кога има доволно вакцини, апсолутно не е дозволиво граѓаните да не се вакцинираат. Со вакцинирањето не само што водат сметка за своето здравје, туку и за здравствениот систем. Ние не можеме бесконечно долго да оставиме вака да биде преоптоварен здравтвениот систем, изјави Филипче.
Посочи дека во изминатите денови комуницирале за тоа какви мерки се воведени во земјите од регионот и во некои земји во Европа. Потсети и дека од вчера е во сила и мерката при влез во објекти и на настани граѓаните да приложат сертификат за примени две дози вакцина или потврда за прележан ковид-19 во последните 45 дена, сметајќи од денот на оздравувањето. Досега можеше да се влезе и со една доза примена вакцина.