Блокада и протест против изградба на мали хидроцентрали на реката Дошница најавуваат група граѓани, активисти, еколошки организации, планинари и заштитници на природата.
Блокадата и протестот ги најавуваат на излетничкото место Смрдлива Вода во Гевгелија секој ден почнувајќи од четврток од 6 часот наутро па се до 18 часот навечер.
Во недопрената природа на Кожуф планина, над Смрдлива Вода, се планира изградба на две мали хидроцентрали на реката Дошница, една од најчистите и недопрените реки во Македонија, велат организаторите.
Главниот протест го најавуваат во недела на 29.06 со почеток од 11 часот.
Овие хидроцентрали, иако административно спаѓаат под Општина Кавадарци, ќе имаат директно негативно влијание врз снабдувањето со вода, живиот свет и природните ресурси во Гевгелија, Демир Капија, Неготино, Росоман и пошироко. Сите пиеме вода од истата планина, Кожуф, велат тие.
Апелираат дека Конска Река во Гевгелија веќе е пресушена. Под закана се и Кранска, Крива, Тополка, Каменичка, Брајчино, Бачишка и многу други планински реки и прашуваат дали ќе се дозволи следна да биде Дошница.
Овој проект: Го загрозува екосистемот и снабдувањето со питка вода, уништува економски, културни и рекреативни вредности и спротивен е на националните и меѓународните закони за заштита на природата, нагласуваат организаторите на протестот и блокадата.
Тие наведуваат три барања: итно и трајно стопирање на проектите за МХЕ на Дошница, почитување на Еспо и Бернската конвенција како и Отворање на документацијата и вистинска јавна расправа.
Ние не ги прифаќаме „зелените“ лаги и злоупотребата на европски субвенции што се користат како параван за алчни концесии под изговор на „одржлива енергија“, а само ни ги сушат реките, ни ги касапат планините и ни ја крадат иднината.
Овие мали хидроцентрали произведуваат занемарливо малку струја, а за возврат го убиваат целиот екосистем. Поткрепено со многу примери во Македонија според еколошките студии, речиси сите мали хидроцентрали во земјава ја пресушуваат реката во деловите каде се поставени! Ова не е развој, ова е крајно неразумно расфрлање со ограничените ресурси со кои располагаме како држава и од кои ни зависи животот во неа. Македонија има ограничени ресурси на питка вода, со многу мали водотеци и климатска ранливост. Секое одвлекување на вода преку цевководи значи ризик од губење на уште еден извор на чиста вода и за нас и за сите следни генерации.
Во Дошница живеат ендемски видови риби и инсекти, меѓу кои и автохтоната македонска пчела (Apis mellifera macedonica) – еколошко богатство што може да го изгубиме засекогаш!, велат организаторите и ги повикуваат граѓаните да им се придружат во блокадите и протестот.