Македонските компании извезле производи во вкупна вредност од 1,6 милијарди евра во првите четири месеци од оваа година, што е за 21,6 отсто помалку во споредна со истиот период во 2019 година, покажуваат податоците на Државниот Завод за статистика. Притоа предничеле катализаторите, односно машините за прочистување на издувни гасови што излегуваат од погоните на „Џонсон Мети“ со слободната индустриска зона „Бунарџик“ и учествуваат со повеќе од 25 отсто во вкупниот извоз во периодот јануари – април.
Во топ 6 на листата најизвезувани производи во првите четири месеци од 2020 година уште три ставки во автомобилската индустрија – сетови за спроводници за палење на возила, седишта и табли за електрична контрола. На списокот има и челични производи, сурови руди, текстилни производи што најчесто одат по принцип на лон доработки.
Единствените два готови производи со повисока додадена вредност се автобусите и лековите. Па, така е забележа извоз на лекови од преку 36 милиони евра, шест повеќе од извозот на автобуси. Од извоз на суров прилепски тутин во првите четири месеци е остварен приход од, речиси, 20 милиони евра и нешто повеќе од 11 милиони евра од јаболка.
Статистиката покажува дека извозот на производи само во април 2020 година во споредба со истиот месец лани е паднат за 60,3 отсто, а драстичен пад од 50,9 отсто е забележан и кај увозот. Тоа се должи на нарушената трговија како последица на корона-кризата што го зафати целиот свет, а не ги поштеди ниту македонските компании кои се соочија со низа проблеми во транспортот, нормалното и редовно снабдување со суровини, проблеми со плаќања и откажани нарачки. Но, сепак, постои надеж дека бројките ќе бидат подобрени во третиот и четвртиот квартал од 2020 година во насока на прогнозите и очекувањата за постепено закрепнување на економијата по разорниот удар на Ковид-19.