Најмалку 40 Палестинци загинаа во израелски воздушни напади во Појасот Газа, соопштија болнички власти кои се под контрола на Хамас на палестинската територија.
Израелскиот премиер Бенјамин Нетанјаху синоќа имаше втора средба во два дена со американскиот претседател Доналд Трамп во Белата куќа. Трамп инсистира на прекин на огнот што би можел да стави крај на 21-месечната војна во Газа. Израел и Хамас разгледуваат нов предлог за прекин на огнот, поддржан од САД, кој би довел до ставање крај на војната, ослободување на израелските заложници и испраќање на толку потребната помош во Газа.
Болницата „Насер“ во јужниот град Кан Јунис соопшти дека меѓу жртвите има 17 жени и 10 деца. Според нив, во еден од нападите загинале 10 лица од исто семејство, вклучувајќи три деца.
Израелската војска не ги коментираше конкретните напади, но соопшти дека во изминатиот ден погодила над 100 цели во Газа, вклучувајќи борци, згради со поставени замки, складишта за оружје, ракетни лансери и тунели. Израел го обвинува Хамас дека крие оружје и борци меѓу цивилното население.