Во судирите меѓу иранските безбедносни сили и демонстрантите, лути поради смртта на 22-годишна жена во полиција, загинаа најмалку девет лица од избувнувањето на насилството во текот на викендот, јавува Асошиетед прес.
Размерот на протестите во Иран, најлоши во последните неколку години, сè уште останува нејасен бидејќи демонстрантите во најмалку десетина градови – гневни поради социјалната репресија и растечките кризи во земјата – продолжуваат да се соочуваат со безбедносните и паравоените сили.
За да спречи ширење на протестите, најголемиот ирански телекомуникациски оператор денеска повторно го затвори пристапот до мобилниот интернет, соопшти Netblocks, група која го следи пристапот до интернет, опишувајќи ги ограничувањата како најстроги од 2019 година.
Иранската државна телевизија извести дека бројот на загинати во денешните масовни протести би можел да биде и 17. „За жал, 17 лица и полицајци присутни на местото на овие настани ги загубија животите“, беше објавено во вестите, со оградување дека официјалната статистика ќе биде објавена подоцна.
Во земја каде што радио и телевизиските станици веќе се под државна контрола и новинарите редовно се соочуваат со закана од апсење, паравоената Револуционерна гарда го повика судството да го гони „секој што шири лажни вести и гласини“ на социјалните мрежи за немирите. Блокадата на Instagram и WhatsApp, кои ги користат демонстрантите, продолжи и денеска.
Демонстрациите во Иран започнаа како ерупција на емоции поради смртта на Махса Амини, млада жена која беше уапсена од „полицијата за морал“ поради наводно прекршување на кодексот на облекување. Нејзината смрт предизвика остра осуда од САД, Европската унија и Обединетите нации.
Полицијата вели дека таа починала од срцев удар и не била малтретирана, но нејзиното семејство вели дека на телото имало знаци на мачење и малтретирање. Независни експерти поврзани со ОН денес рекоа дека извештаите сугерираат дека таа била жестоко претепана од полицијата.
Протестите траат веќе пет дена при што жените ги вадат и палат нивните шамии што државата им наложува да ги носат на улиците. (АП)