Турција и Германија соопштија дека договорот меѓу ЕУ и Анкара го намалил приливот на имигранти на грчките острови, но не го запрел, бидејќи обидите за преминување на Егејско Море не престанале, а во Грција сe уште се блокирани 50.000 луѓе.
Договорот што стапи на сила во понеделеникот а беше потпишан на 18 март има за цел да го запре бранот што минатата година во ЕУ донесе повеќе од еден милион имигранти, а оваа година уште 150.000 во Грција.
Бројот на мигрантите што пристигнале на грчките острови од Турција во средата наутро се намали на 68 во последните 24 часа, во споредба со 225 мината претходниот ден, соопшти грчкото Министерство за миграција.
Падот е голем во споредба со речиси 9.200 пристигнувања во еден ден во октомври, кога беше кулминацијата на мигрантскиот бран.
Портпаролот на Германската Влада, која најмногу лобираше за Договорот за да ги убеди скептичните европски партнери и која е под притисок од домашната јавност да покаже напредок, рече дека работите се движат во вистинската насока.
Но бројот на илегалните имигранти на грчките острови варира, соопшти Агенцијата на ОН за бегалци (УНХЦР), што е од суштинско значење на договорот.
– Условите што ги принудуваат овие луѓе да бегаат кон Европа не исчезнаа и тие луѓе сè уште се обидуваат, изјави портпаролот на УНХЦР на Лезбос Борис Чеширков.
Од понеделникот во Турција се вратени 202 луѓе, претежно Пакистанци. Поради зголемениот број барања за азил поднесени од поединци, Грција до петок ја суспендира депортацијата.