Панче Ангелов, обвинетиот за нападот на сегашната министерка за одбрана, Радмила Шеќеринска на денешната јавна седница на Апелацискиот суд во Скопје, побара наместо казната од 4 години затвор за кривичното дело насилство, да му биде изречена условна казна.

-Судот неправедно ме осуди на голема казна. Не употребив сила ни спрема Заев, ниту спрема Шеќеринска. Само ја фатив за коса и ја тргнав, не ја повредив, рече тој пред Апелацискиот суд.

Тој пред судот рече дека казната ја смета за престрога. Панче Ангелов беше обвинет за кривично дело насилство и од Основниот суд Скопје 1 беше осуден на казна затвор од 4 години.

Обвинителот од Вишото јавно обвинителство, Јован Цветановски, на денешната јавна седница рече дека бара да се одбие предлогот на обвинетиот.

Судијката при изрекувањето на неговата пресуда нагласи дека во одредувањето на висината на казната преовладуваат отежителните околности.

-Обвинетиот Ангелов призна вина и беше свесен за тоа. По неговото признание беа изведени доказите, а законот за ова кривично дело предвидува казна од 3 до 10 години затвор. Обвинетиот Ангелов судот го огласува за виновен и го осудува на затворска казна од 4 години. Судот смета дека со ваквата пресуда ќе се постигнат целите на казнувањето, како и тоа дека пресуда ќе служи за пример на останатите граѓани на Република Македонија, рече при објавување на пресудата судијката Џанета Бектовиќ.

Обвинетиот Ангелов призна вина пред првостепениот суд, рече дека се кае за стореното и побара од судијката да не оди во затвор, оти, како што кажа живеел сам и немало кој да му помогне.

По одржаната јавна седница Апелацискиот суд треба за околу еден месец да донесе одлука колкава ќе биде казната за обвинетиот за нападот на Шеќеринска.