Уште рано изутрина пријавивме Службите за итна медицинска помош да ги преземаат итните случаи, а пациентите кои се со хронична терапија беа услужени со рецепти во првите денови од април. На работните места останаа само колегите во руралните предели, а другите 90 отсто лекари ќе бидат дојдени некаде пред 12 часот пред Министерството, изјави за НоваТВ, претседателката на Здружението, д-р Лили Чолакова Дервишова
Третиот протест на матичните лекари почнува денеска напладне, на Светскиот ден на здравјето – 7 април, пред Министерството за здравство, во организација на Здружението на приватни лекари.
– Најголемиот број колеги од целата земја утринава тргнаа на протестот, а многумина се од поддалечните градови. Уште рано изутрина пријавивме Службите за итна медицинска помош да ги преземаат итните случаи, а пациентите кои се со хронична терапија беа услужени со рецепти во првите денови од април. На работните места останаа само колегите во руралните предели, а другите 90 отсто лекари ќе бидат дојдени некаде пред 12 часот пред Министерството. Очекуваме масовен одзив и присуство и на колегите стоматолози, специјалисти интернисти, како и на други лекари од приватното здравство, медицински сестри и на лаборанти, изјави за НоваТВ, претседателката на Здружението, д-р Лили Чолакова Дервишова.
Таа додава дека со надлежните од Фондот за здравствено осигурување не преговарале неколку години, а проблемите се наталожиле, па сега имаат повеќе барања.
Матичните лекари бараат, меѓу другото, капитациониот бод да изнесува 90 денари, промена на режимот на препишување лекови и да важат препораките за хронична терапија, промена на казнената политика, електронско здравство, како и да се променат буџетите за лекарите специјалисти и за лабораториите.
Управниот одбор на ЗПЛРМ донесе одлука на 7 април да има протести на здравствени работници пред Министерство за здравство во Скопје во 12 часот, е објавено на страницата на Здружението на приватни лекари.
(Љ.Б.)