Уште една ВАР асистенција, промашен пенал, солидно темпо и победа на Данска донесе третиот од четирите меча на денешната програма, вкупно седми на Светското фудбалско првенство во Русија. Трите бода за скандинавската селекција ги осигура Полсен во 59 минута.

Перуанците подобро влегоа во натпреварот во Саранск и уште од почеток демонстрираа силна желба за докажување на мундијалската сцена на која апсинираа цели 36 години. Поголем дел од времето го минаа на противничката половина, се обидуваа да пробијат со нафрлувања од страничните позиции, низ средината, со удари од дистанца, но зицерот го имаа на минута пред одморот. Куева изнуди пенал што беше досуден по прегледување на спорниот момент и наместо реализација шутираше катастрофално и високо над голот.

https://www.youtube.com/watch?v=ApNsCggY3Ls

Второто полувреме го донесе и единствениот момент што на крајот се покажа како клучен за победникот. Кристијан Ериксен поведе данска контра, го проигра Полсен кој со прецизен и одмерен удар го сиовлада Галјезе. Перу во продолжението имаше прилики за израмнување меѓутоа голот на Шмајхел како да беше маѓепсан за тимот на Рикардо Гарека. Ништо поефектни не беа ниту Данците во обид за втор гол и потврда на триумфот, па резултатот од 59. минута остана актуелен и по последниот свиреж на главниот судија Бакари Гасама од Гамбија.

Во воведниот меч од групата Ц, Франција, потешко од очекувањата, ја совлада Австралија со 2:1.

Перу – Данска 0:1 (0:0)

Стадион: „Мордовија арена“ во Саранск. Гледачи: Гл. судија: Бакари Гасама (Гамбија). Асистенти: Жан Клод Бирамушаху (Бурунди) и Абделхак Ечиали (Алжир). Ж. картони: Тапија (Перу) – Дилејни, Полсен (Данска). Стрелец: Полсен 59’ за Данска.

Перу (формација 4-2-3-1): Галјезе – Адвинкула, Родригез, Рамос, Трауко – Тапија (Акино 87’), Јотун – Карилјо, Куева, Флорес (Гереро 62’) – Фарфан (Руидијаз 85’). Селектор: Рикардо Гарека.

Данска (формација 4-3-3): Шмајхер – Стригер, Кристенсен (Занка 81’), Кјаер, Далсгард – Дилејни, Ериксен, Квист (Шоне 35’) – Систо (Брејтвајт 67’), Н. Јоргенсен, Полсен. Селектор: Аге Хареиде.