Контролите на српското брашно редовно се вршат и оваа година, во изминативе два и пол месеца не се детектирани никакви отстапувања во однос на безбедноста, рече денеска директорот на Агенцијата за храна и ветеринарство (АХВ) Зоран Атанасов.
Лани, како што наведе Атанасов на прес-конференција, Македонија врати 75 тони брашно во Србија, но не поради небезбедност, туку поради несоодветно означување.
Во врска со вчерашната прва седница на Мешовитиот комитет меѓу Македонија и Србија што се одржа во Белград и на која, меѓу другото, требаше да стане збор за маркичките на брашното, Атанасов информира дека е разговарано за надминување на досегашните вештачки бариери кои ја отежнуваа размената.
– Направен е напредок во разговорите со Србија во делот на признавањето на одредени лабораториски анализи што досега беше проблем, истакна директорот.
На прашањето како ги оценува ГМО-анализите што ги прави Србија на македонскиот ориз, Атанасов рече дека тоа се вид вештачки, скриени бариери кои само го отежнуваат процесот на извоз, а токму за тоа се разговара, за нивно натамошно отстранување.
Мешовитот комитет за надминување на проблемот со увозот на српското брашно во Македонија беше инициран на средбата што на почетокот на овој месец се одржа во Скопје меѓу министрите за земјодлелство на Македонија Љупчо Николовски и за тргови на Србија Расим Љајиќ.
Тие тогаш потпишаа и договор-на брашното пакувано од 1, 2 и 5 килограми контролните маркички ќе се лепат во Србија, на пакувањата од 25 и 50 килограми во Македонија.