Србија ќе продолжи со извозот на брашно во Македонија, откако денеска министрите за земјоделство Љупчо Николовски и за трговија Расим Љаиќ во Скопје постигнаа договор, со што е надминат проблемот кој настана откако минатата недела српските мелничари побараа Србија да воведе реципрочни мерки поради новиот македонски Правилник за увоз на брашно, кој според нив го отежнува извозот на српско брашно во Македонија.
Министрите Николовски и Љајиќ потпишаа договор-на брашното пакувано од 1, 2 и 5 килограми контролните маркички ќе се лепат во Србија, на пакувањата од 25 и 50 килограми во Македонија.
Македонскиот Правилник за увоз на брашно, согласно договореното, ќе биде сменет уште денеска.
Николовски и Љајиќ по средбата истакнаа дека двете страни направиле отстапки за да се дојде до решение на проблемот, а брашното само ги отворило прашањата за бариерите кои мора да се отстранат за да се унапреди трговијата меѓу двете земји.
– Ова е почеток на долгорочно решавање на сите проблеми меѓу двете влади во делот на земјоделството и трговијата, изјави Николовски по работниот состанок во Скопје.
Одговорноста за проблемот со брашното, Николовски ја лоцираше во, како што рече, нефункционирањето на македонските институции изминатите 11 години
– Клучниот проблем во Македонија последните 11 години е нефункционирањето на институциите, на Инспекторатот, на АХВ и неработењето по процедурите и соодветните протоколи. Токму и еден од заклучоците на состанокот беше воведување засилена интегрирана контрола која треба да ја изградиме и да функционира, изјави Николовски.
Љаиќ рече дека потпишани се 10 заклучоци поврзани со трговските односи на Србија и Македонија и формиран е заеднички Комитет за решавање на вонцаринските бариери.
Тој најави дека првата седница на овој Комитет ќе с еодржи на 14 март при што ќе се бара долгорочно и одржливо решение за отстранување на сите вонцарински бариери и зголемување на трговската размена меѓу двете земји.
Српскиот министер од Скопје порача, има политичка подготвеност за отстранување на сите царински бариери со цел трговската размена да се зголеми од сегашните 760 милиони, на милијарда евра.
Според него, непримерно е да се влезе во трговска војна со Македонија воочи заедничката седница на двете влади што ќе се се одржи на 21 март во Ниш.
-Македонија за нас е седми по големина извозен пазар каде извезуваме 560 милиони евра стока и тоа сакаме да го зголемиме, но не можеме ако се воведуваат постојано бариери. Се договоривме во целост да се применуваат спогодбите за признавање на меѓусебните сертификати за да не се задржуваат камионите на граница, изјави Љаиќ за Танјуг по средбата во Скопје.