Вчера се одржа националистички израелски марш за годишниот Марш за Денот на Ерусалим што го одбележа израелското заземање на Источен Ерусалим во 1967. Исто така на друг крајно десничарски марш во Ерусалим кој се случил на 22ри април, израелските демонстранти извикувале „Смрт за арапи“ и „Нека ви гори селото“. Се смета дека овој националистички марш, како и насилството и долгите легални процедури низ кои поминуваат палестинците кои живеат во источен Ерусалим, придонесоа до ескалацијата на насилството вчера.
Во последните неколку дена се случуваат повторни судири помеѓу палестинските демонстранти и израелската полиција откога израелските власти се обидоа да иселат повеќе палестински семејства кои живеат во населбата Шеик Џарах во источен Ерусалим и да населат еврејски жители. Во оваа населба исто така се наоѓа Џамија Ал-Акса, третото најсвето место за верниците од муслиманска вероисповед. Во судирите со полицијата биле повредени стотици палестинци наспроти околу само 20 израелски полицајци.
Насилството дополнително ескалираше вчера кога по полициската бруталност во Шеик Џарах, милитантни палестински групи истрелаа ракети близу до Ерусалим, но изгледа дека никој бил убиен од овој напад. За разлика од овој напад, 24 палестинци беа убиени од страна на израелски воздушни напади врз окупираната палестинска територија Газа – девет од убиените биле деца.
Во интервју со Democracy Now!, палестинскиот поет и писател Мохамед Ел-Курд, кој живее во Шеик Џарах, вели дека секоја година слуша како се извикуваат националистички и расистички пароли на маршот на Денот на Еурсалим. Во интервјуто, 22-годишниот писател раскажува за како неговата куќа во која тој живее со неговото семејство е делумно окупирана од страна на Џејкоб, американец од Бруклин, Њу Јорк. Ел-Курд вели дека овој човек е колонизатор и дека веќе подолго време се случуваат вакви работи во неговата населба заради „организации на доселеници поддржани од милијардери, често регистрирани во САД, кои ги вработуваат овие луѓе да доаѓаат и да живеат во нашите домови и да нè малтретираат и заплашуваат.“
Во многу гледано онлајн видео може да се види Муна Ел-Курд, сестрата близначка на Мохамед Ел-Курд, како се расправа со лицето Џејкоб кој живее во дел од нејзината куќа 12 години. Кога Муна му вели на Џејкоб дека тој ѝ ја краде куќата, тој ѝ вели „Ако јас не ја украдам, некој друг ќе ја украде.“
САД, Европската унија и Велика Британија ги повикаа Израел и Палестинците да ги намалат тензиите што е можно поскоро. Но Мохамед Ел-Курд смета дека ваквите изјави од страна на меѓународната заедница не се доволни и дека често тие го истоветуваат системското насилство кое го трпат палестинците од страна на окупирачката израелска сила со повремените одбранбрени напади од палестинците и дека со вакви изјави ефективно само се поддржува израелската окупација.
„Ја повикувам меѓународната заедница, но исто така ги повикувам луѓето, слободните луѓе во светот, да преземат нешто против ова, да се стави крај на израелската окупација на Палестина во целост. Не станува збор само за Шеикот Џарах. Станува збор за целата Палестина, која е проголтана од ѕверот на израелскиот колонијализам,“ кажа Мохамед Ел-Курд.
Светот продолжува да ги следи настаните во источен Ерусалим и други места каде живеат палестински жители, но не е јасно кога и дали насилството од страна на израелската влада предводена од Бенџамин Нетенјаху – кој е обвинет за корупција – би можело потенцијално да де-ескалира.
Елена Гаговска