Отказ од работа доби Владо Димовски, наставник по македонски јазик и граѓански активист, учесник во Шарената револуција и Наставничкиот пленум. Димовски кој отказот го добил без образложение од директорот во ОУ„Алија Авдовиќ“ во село Батинци, општина Студеничани, за НОВА тврди дека сето ова е поради неговите активности во Шарената револуција и Наставничкиот пленум.
„Отказното решение го добив на 31 јануари, без никакво образложение и тоа веднаш по гостувањето на една телевизија каде зборував за проблемите во образованието. Директорот одбегнуваше да ме прими, а исто и градоначалникот на Студеничани каде што побарав прием. На сето ова претходеше намалување на бројот на часовите во ноември минатата година“, изјави во интервју за НОВА, Димовски.
Во изминатиот период тој отворено говореше за неквалитетното образование и ниското ниво на квалитет на наставничкиот кадар особено на тие што работат со завршено средно образование и најчесто се вработувани по партиска линија.
„Не сум бил послушник, не требало да говорам јавно. Но, јас реков и пак ќе речам секогаш ќе се залагам за квалитетно образование во она што најдобро го знам и ќе бидам борец, образованието во Македонија да го добие своето место“, изјави Димовски.
Во 2015 та година напиша отворено писмо до министерот за образование каде што го критикуваше екстерното тестирање, лошите услови во училиштата, неквалитетните компјутери, лошите учебници, проблемот со греењето. Целиот разговор со Димовски може да го гледате во недела во 16 часот во емисијата ПРОЦЕС.