ЕУ денес назначи нова специјална претставничка на Косово.
Станува збор за Бугарката Наталија Апостолова која го наследува Словенецот Самуел Жбогар на 1 септември 2016 година. Жбогар пак ќе допатува во Скопје и застанува на чело на Делегацијата на ЕУ во Македонија на местото на Аиво Орав.
Функцијата на специјален пратеник подразбира промовирање на стабилно, мирно, демократски и мулти-етничко Косово со зајакнување на стабилноста во регионот преку регионална соработка и добрососедски односи, се вели во соопштението на ЕУ.
Според ЕУ, Апостолова има задача во Косово да ја поддржи правната држава, заштитата на малицинствата и на културното и религиозно наследство. Освен тоа таа треба и даде поддршка европската перспектива на Косово.
Апостолова е бугарски дипломат. До 2013 година таа била шефица на ЕУ Делегацијата во Триполи а пред тоа заменик на шефот на ЕУ Делегацијата во Каиро. Работела и во Европската комисија. Во дирекцијата за проширување таа работела на транспортните мрежи во земјите кандидати. Апостолова била дипломат во бугарската мисија при ЕУ во Брисел.