НАТО ќе ги зајакне своите хемиски, биолошки и нуклеарни одбранбени системи поради стравувањата дека Русија планира да употреби такво оружје против народот на Украина, изјави денес генералниот секретар Јенс Столтенберг.
„Нашиот сојузнички воен командант генерал Волтерс ги активира хемиските, биолошките, радиолошките и нуклеарните одбранбени елементи на НАТО, а сојузниците распоредуваат дополнителна хемиска и биолошка и нуклеарна одбрана за да ги зајакнат нашите постоечки и нови групи за поддршка“, им рече тој пред новинарите во Брисел по вонредниот состанок на шефовите на држави и влади.
Загриженоста произлегува од „апсолутно лажната“ руска реторика дека САД, НАТО сојузниците и Украина се подготвуваат да употребат биолошко оружје, рече Столтенберг. „Видовме претходно дека овој начин на обвинување на другите е всушност начин да се обиде да создаде изговор да го сторат истото и самите“, подвлече тој.
Пред тој да зборува, лидерите на НАТО издадоа заедничка изјава во која ветија дека „ќе ја зголемат подготвеноста за хемиски, биолошки, радиолошки и нуклеарни закани“, додавајќи дека „понатамошни одлуки“ ќе бидат донесени на следниот самит на НАТО, закажан за ова лето во Мадрид.
„Секоја употреба на хемиско или биолошко оружје од страна на Русија би била неприфатлива и би резултирала со тешки последици“, се додава во изјавата.