Вкупно 289 лица не го почитувале полицискиот час за време на продолжениот празничен викенд. Од нив приведени биле 187, а 355 граѓани се санкционирани за неносење лична заштита на лице.
Министерството за внатрешни работи (МВР) информира дека само во изминатото деноноќие на ниво на целата држава, 126 лица ја прекршиле забраната за движење, при што се приведени 79 лица, а за останатите се земени податоци и ќе следуваат соодветни мерки. По однос на мерката за неносење лична заштита на лице регистрирани се 18 прекршоци.
Само во последните 24 часа на територијата на Македонија се издадени решенија за изолација на 68 лица, а 19 потпишале изјави за самоизолација. Од страна на полициски службеници извршени се контроли кај лица во изолација и самоизолација, при што не се евидентирани прекршувања на мерката.
Полицијата евидентирала дека во текот на 24/25 мај, 104 лица не го почитувале полицискиот час, а 76 од нив се приведени. Лична заштита на лице не носеле 82 лица. На 23 и на 24 мај, полицискиот час го прекршиле 59 лица, 32 се приведени, додека 255 лица не носеле маски на лицето.