Емил Рајковиќ почна Александар Јоневски му помагаше, Јончевски продолжи Горан Крстевски му помагаше, Крстевски продолжува Књазев помага, но МЗТ Скопје никако да се извлече од „црната дупка“ во која е западнат. Македонскиот кошаркарски првак вечерва загуби на домашен терен и од Лиеткабелис со 80:87 (20:21, 12:25, 17:16, 31:25) во петтото коло во Еврокупот. Вреди да се напомене дека Шарлон Клоф сè уште се опоравува од повредата, а клубот од СЦ „Јане Сандански“ ја прекина соработката со Урош Лучиќ и Љубомир Младеновски пред мечот што беше дополнителен удар во целата ситуација.
Синовец и Кларкс уфрлија по 20 коша, Темс постигна 16, Скот 12 и Диабате 10 што, сепак, не беше доволно за прва победа во второто по ранг натпреварување на организацијата под чија капа е елитната Евролига. Два скромни поена од Дреновац, без учинок завршија Ѓуроски, Лалиќ и Симоновски и Мекиќ кои имаа променлива минутажа. Леонавичиус беше најефикасен во литванскиот состав за кој сите што влегоа во игра запишаа поени.
Лиеткабелис по вторпат ги совлада „металците“ благодарение на играта и резултатот во вториот период (25:12) и на одмор заминаа со 46:32. Двата во второто полувреме завршија на страна на домашната екипа, но далеку од разлика за анулирање на негативата.
МЗТ Скопје е убедливо последен на табелата во групата А со скор 0-5 каков имаат уште и Будуќност и Унион Олимпија во две од преостанатите три конкуренции. „Металците“ веќе во петок ги очекува нова обврска. Ќе бидат домаќини на ФМП во рамки на АБА лигата во нов обид да забележат победа во сезоната во која моментно имаат вкупен биланс 2-12.