Требаше да минат девет трки во Формула 1 шампионатот во оваа сезона за јавноста да добие победник што не е во болид на Мерцедес. Во случајот не е ниту од Ферари чии фанови остануваат да почекаат некоја наредна прилика за славје. Макс Ферстапен ја прекина доминацијата на Луис Хамилтон и на Валтери Ботас на победничките подиуми во „летечкиот циркус“ во 2019 година. Холандскиот пилот на Ред Бул Хонда победи во трката за ГН на Австрија, но иако имаше најбрзо време и мина прв низ целта, сепак, мораше да ја одложи прославата поради жалбата за инцидентот со Шарл Леклер.
Ферари веднаш реагираше по загубената трка. Ферстапен го нападна Шарл Леклер во 68. круг, а возачот од Монако успеа да се одржи на чело на колоната. Но, Холанѓанецот беше упорен, па еден круг подоцна повторно се обиде да го преземе водството во трката. И успеа. Обајцата возеа еден крај друг, црвениот болид за кратко излета од патеката по благиот контакт, а Ред Бул го искористи моментот и поведе.
По тричасовни проверки на ситуацијата е донесен заклучок дека нема вина ниту кај Ферстапен ниту кај Леклер и инцидентот е оценет како „тркачки“ за кој нема потреба да се преземаат мерки. Со тоа стана и дефинитивна победата на Холанѓанецот на „Ред Бул Ринг“, негова втора во низа за ГН на Австрија, вкупно шеста во кариерата и прва во 2019 година.
Второто место го освои Леклер, трет е Финецот Валтери Ботас. Зад нив се пласираа Себастијан Фетел и бранителот на титулата, Луис Хамилтон кој останува лидер во генералниот пласман со 197 бода, 31 повеќе од финскиот колега. Следува двонеделан пауза во Формула 1 шампионатот во која наредна станица е Силверстон и ГН на Велика британија (12 – 14 јули).
Резултати од трката за ГН на Австрија
Макс Ферстапен (Холандија/Ред Бул Хонда) 1:22:01.822 часа
Шарл Леклер (Монако/Ферари) + 2.724 сек.
Валтери Ботас (Финска/Мерцедес) + 18.960 сек.
Себастијан Фетел (Германија/Ферари) + 19.610 сек.
Луис Хамилтон (В. Британија/Мерцедес) + 22.805 сек.
Ландо Норис (В. Британија/Мекларен Рено) + 1 круг
Пјер Гасли (Франција/Ред Бул Хонда) + 1 круг
Карлос Сајнц (Шпанија/Мекларен Рено) + 1 круг
Кими Раиконен (Финска/Алфа Ромео) + 1 круг
Антонио Џовинаци (Италија/Алфа Ромео) + 1 круг, итн.
Генерален пласман кај возачи
Луис Хамилтон (В. Британија) 197 бода
Валтери Ботас (Финска) 166
Макс Ферстапен (Холандија) 126
Себастијан Фетел (Германија) 123
Шарл Леклер (Монако) 105
Пјер Гасли (Франција) 43
Карлос Сајнц (Шпанија) 30
Ландо Норис (В. Британија) 22
Кими Раиконен (Финска) 21
Даниел Рикардо (Австралија) 16, итн.
Генерален пласман кај конструктори
Мерцедес 363 бода
Ферари 228
Ред Бул Хонда 169
Мекларен Рено 52
Рено 32
Алфа Ромео 22
Рејсинг Поинт БВТ Мерцедес 19
Скудерија Торо Росо 17
Хас 16
Вилијамс Мерцедес 0.