Во Кривичниот суд денеска ќе биде соопштена пресудата за предметот „Триста“, во кој обвинет е поранешниот помошник-министер за внатрешни работи Ѓоко Поповски за злоупотреба на службена должност во врска со јавната набавка на 300 возила.
На минатото рочиште беа изнесени завршни зборови на обвинителите од Специјалното јавно обвинителство и на одбраната.
СЈО побара осудителна пресуда за Поповски за кривичното дело за кое е обвинет, за што е предвидена казна затвор од четири до 15 години и надомес на штета од над 27 милиони денари и судски трошоци.
Одбраната, пак, побара Поповски да биде ослободен од обвинението. Поповски пред Судот кажа дека не е виновен и оти постапката што се води против него сериозно влијаела на неговото здравје. Рече и дека во изминатиот период се соочил со многу закани, уцени и притисоци, но не прецизира од кого. Тој се пожали и дека му бил даден отказ од МВР во, како што наведе, сомнителна дисциплинска постапка.
Ѓоко Поповски е обвинет дека со јавната набавка на 300 возила за МВР го оштетил буџетот за 453.570 евра. Според СЈО, Поповски незаконски доделил договори за купопродажба и одржување возила на Порше Македонија ДООЕЛ Скопје, Ка-Дис ДОО Скопје, Бохемија Автомобили Роус ДООЕЛ Скопје, Колевски ДОО Скопје и Авто Куќа ДОО Скопје избрани како економски најповолни понуди.
Утре пресуда за „Тенк“
Утре ќе биде објавена пресудата за случајот „Тенк“ на Специјалното јавно обвинителство за набавката на владиниот мерцедес од близу 600.000 евра.
Специјалното јавно обвинителство во завршните зборови минатата недела побара судот да ги прогласи за виновни поранешниот премиер Никола Груевски и поранешниот помошник-министер во МНР Ѓоко Поповски, како и да ги платат судските трошоци во висина од 313.160 денари. Обвинителот Гаврил Бубески побара судот при утврдување на кривичната одговорност на обвинтетите да ги имаат предвид отежнителните околности дека Груевски дејствувал со директна умисла додека бил премиер и делото го направил од лична желба, но со буџетски средства, а како олеснителна околност неговата семејна состојба.
На новинарско прашање по завршување на рочиштето за висината на казните на обвинетите, Бубески, рече дека за Ѓоко Попоски е предвидена казна затвор од пет до 15 години, додека за Никола Груевски е предвидена казна затвор од една до три години и дека очекуваат во тие рамки да се движи и судот.
Обвинетиот Никола Груевски во завршен збор наведе дека овие судски процеси се класично политички и ова судење е дел од една политичка хајка против него и неговите соработници.
– Овој фабрикуван предмет во кој нема никакви докази против мене се одвиваше многу брзо. Во него сум обвинет за тоа што сум сакал да се возам со кола. Не сум искористувал положба и влијание врз некој за јас да добијам некаква корист. Не сум барал набавка на луксузно возило и незаконско фаворизирање на Мак Ауто Стар и не сум барал да нема конкуренција во набавката. Никогаш наведеното возило не ми било дадено исклучиво на мое користење, рече Груевски.
Посочи дека барањето за набавка на ново блиндирано возило доаѓало од укажувањата на сите засегнати и запознаени професионалци со состојбата и условите на безбедносните возила кои ги поседувала Република Македонија.
Обвинетиот Ѓоко Поповски во завршен збор наведе дека договорениот орган МВР иако немал обврска, одлучил да спроведе постапка за јавна набавка со цел да добие пониска цена за блиндирано возило.
– Сметам дека успеав да докажам дека не сум ја злоупотребил службената положба и не сум фаворизирал ниту една марка и очекувам судот да го отфрли обвинението против мене, рече Поповски.
Во „Тенк“ обвинети се поранешниот премиер Никола Груевски, поранешниот помошник министер во МВР Ѓоко Поповски и поранешната министерката за внатрешни работи Гордана Јанкулоска, за која постапката е издвоена поради „ризична бременост“.Тие се обвинети за набавката на луксузниот мерцедес од 600 илјади евра.
„Поткуп“ ја почна неделата
Вчера, Кривичниот суд го ослободи од вина премиерот Зоран Заев, во случајот „Поткуп“, во кој беше обвинет за барање поткуп од струмичкиот бизнисмен Иван Николов, како градоначалник на Струмица во 2015 година.
Заев е ослободен бидејќи Обвинителството не докажало дека тој го сторил делото.
-Како и за секој граѓанин трауматичен е моментот додека ја слушате пресудата, но сум среќен сум што добив ослободтелна пресуда и дочекав правда. Му го посакувам тоа на секој граѓанин преку транспарентни постапки како што беше и мојата. Преку ова се виде целиот процес. Јас ова го очекував, изјави премиерот Зоран Заев откако ја слушна пресудата за случајот Поткуп, со која е ослободен од вина.