Иако во државите низ светот забрзано се шири Омикрон сојот на коронавирусот, во Македонија засега не е регистриран ниту еден случај. Се уште доминантен во земјава е Делта сојот, што е случај и во државите од регионот. Во меѓувреме, надлежните повикуваат на помасовна вакцинација, која претставува единствен реален излез од пандемијата.
Новиот сој Омикрон вчера за првпат беше потврден на Балканот. Поточно, станува збор за двајца пациенти од Хрватска кои се инфицирале со новиот сој, а притоа не престојувале во Јужна Африка, но биле на состаноци на кои имало гости од странство.
Иако овој сој забрзано се шири, првите индикации покажуваат дека тој е помалку опасен од Делта сојот. Ова вчера го изјави главниот советник на американскиот претседател за пандемијата, инфектологот доктор Ентони Фаучи.
Според Светската здравствена организација (СЗО), лицата заразени со сојот Омикрон, обично имаат поблага форма на болеста.
Техничката раководителка на Светска здравствена организација (СЗО) за ковид-19, Марија Ван Керкова изјави дека е потребно време за заразените да минат низ целиот процес на инфекција и оти можеби ќе минат неколку недели пред навистина да стане јасно колку луѓе од заразените со сојот Омикрон ќе развијат тешка форма на болеста.
Но, таа предупреди дека дури и да се работи за полесна форма на болеста, важно е брзо да се делува за да се преземат мерки за контрола на нејзиното ширење.