По речиси два часа распит кај судија на претходна постапка, градоначалникот на Битола Владимир Талески го напушти Кривичиот суд од задната страна со приватно возило.
Талески беше придружуван од адвокатот Никола Додовски кој воедно е и адвокат на Никола Груевски, а иако обвинителите на Специјалното обвинителство донесоа кутии со докази, по се изгледа судот не одреди мерка- притвор за битолскиот градоначалник, како што бараше СЈО.
Талески е еден од осомничените во случајот Транспортер, во кој 22 лица се товарат за незаконски тендери за транспорт на учениците од училиштата во регионот на Битола.
Истрагата опфаќа вкупно 81 криминално дејствие, спротивни на Законот за јавни набавки и Законот за средно и основно образование, а освен градоначалникот осомничени се уште 22 лица за злоупотреба на службената положба и проневера на пари.
За Талески првично од СЈО бараа само конфискација за дел од неговиот имот, бидејќи и тој се најде на листата на помилувани од Иванов.
По укинување на аболицијата, СЈО побараа мерка притвор за него.
Случајот со превозот на учениците, беше споменат и во 19. „бомба“ на опозицијата, во која министерот за финансии Зоран Ставрески во разговор со екс-министерката за внатрешни Гордана Јанкулоска, споменува дека битолскиот градоначалник за превоз на учениците склучил договор „коруптивен до даска“ со цени десет пати повисоки од предвиденото.