Американскиот гигант за брза храна Мекдоналдс ќе излезе од рускиот пазар и ќе го продаде својот бизнис, соопшти денес компанијата. Во соопштението се вели дека по повеќе од 30 години работење во земјата, корпорацијата Мекдоналдс објави дека ќе излезе од рускиот пазар и започна процес за продажба на својот бизнис во Русија.
„Хуманитарната криза предизвикана од војната во Украина и непредвидливата бизнис клима, го наведоа Мекдоналдс да заклучи дека бизнисот во Русија повеќе не е одржлив, ниту е во согласност со вредностите на Мекдоналдс“, се наведува при објавувањето на одлуката. Портпаролката на компанијата рече дека Мекдоналдс сака да го продаде „целото свое портфолио во Русија на локален купувач“. Притоа по продажбата, рестораните повеќе нема да можат да го користат името, логото, брендирањето или менито на Мекдоналдс.
Русија, каде Мекдоналдс директно управува со повеќе од 80 отсто од рестораните што го носат неговото име, учествува со 9 отсто од приходите на компанијата и 3 отсто од нејзината оперативна добивка.
Главниот извршен директор Крис Кемпчински изјави: „Ние сме исклучително горди на 62.000 вработени кои работат во нашите ресторани, заедно со стотиците руски добавувачи кои го поддржуваат нашиот бизнис и нашите локални франшизи. Нивната посветеност и лојалност кон Мекдоналдс ја отежнуваат денешната објава. Сепак, ние имаме посветеност на нашата глобална заедница и мора да останеме цврсти на нашите вредности“.
Мекдоналдс во март ги затвори сите свои 850 ресторани во земјата, каде што вработува 62.000 луѓе.