Независниот синдикат на професионални војници обвини дека во Министерството за одбрана е формиран нов синдикат кој, според нив, е под директно влијание на раководството на институцијата.
Од синдикатот тврдат дека новоформираниот „Синдикат на вработените во одбраната и Армијата“ бил основан од лица на раководни функции во Министерството за одбрана, меѓу кои, како што наведуваат, има раководители на сектори, бригаден генерал, командант на единица и други лица блиски до раководството.
Се наведува дека станува збор за „наменски синдикат“ преку кој министерот за одбрана Владо Мисајловски ќе преговара за најавените законски измени и новиот колективен договор.
Од Независниот синдикат обвинуваат и дека со Министерството нема вистински социјален дијалог, наведувајќи дека последната средба со министерот ја имале во ноември 2024 година, по што, како што велат, нивните барања за повисоки плати и подобри права биле игнорирани.
„Синдикализмот и правата на работниците во Република Македонија се сведоа на преговори со подобни синдикати и игнорирање на неподобните синдикати“, наведуваат од Независниот синдикат на професионални војници.