Еден пожарникар е полесно повреден при гаснење пожар во Тетово во текот на вчерашниот ден, а противпожарната единица морала да интервенира на десетина места во периодот од 8 часот до 3 часот утрово.
– Вчера имавме пожар кај Спортскиот центар во Тетово, при што беше повреден пожарникар. Освен таму на отворено имавме пожари во атари на селата Брвеница и Жеровјане, на дива депонија, во куќа и во плевна во Челопек и на возило на автопатот Тетово – Скопје. Причини се високите температури и несериозноста на граѓаните кои палат на отворен простор, информира Ука Алити, командант на тетовската пожарна.
Во СВР Тетово во текот на првите шест месеци од годинава, заклучно со 24 јуни, бројот на пријавените пожари изнесува 54 на отворен простор, во поле, шумски предели и други места.
– Во два од нив се регистрирани и човечки жртви, една на гостиварските и една на тетовските простори. Речиси во сите пожари, пак, е причинета значителна материјална штета. Секторот за внатрешни работи Тетово апелира до граѓаните да бидат постојано внимателни ако се движат или работат во полето и низ шумите, да не ги палат отпадоците, меѓите и стрништата на нивите и да не фрлаат неизгаснати догорчиња со цел да се избеге појава на пожари, истакна Марјан Јосифоски, портпарол на СВР Тетово.
Од полицијата потсетуваат дека намерно предизвикување на шумски пожар или од невнимание, претставува кривично дело што се санкционира со соодветни поднесоци и за кое е предвидена и затворска казна до 8 години (член 227 од Кривичниот законик), зависно од видот на пожарот и другите околности и последици.
Минатата 2020 година на подрачјето на СВР Тетово вкупно биле пријавени 112 пожари, најмногу во летниот период.