Премиерот Зоран Заев, како обвинет во случајот Поткуп, на денешното судско рочиште го испрашуваше сведокот Иван Николов, кој го обвинува за мито.
Николов во претходното сведочење истакна дека со Заев се среќавале само во неговиот градоначалнички кабинет, а Заев го праша дали е ова точно, набројувајќи неколку места на кои се среќавале.
Николов негираше, а Заев му посочи дека се сретнале во 2014 година пред Домот на АРМ и разговарале.
Заев исто така директно го праша Николов, дали за земјиштето од 7.000 квадрати кое ги купил му дал поткуп од 1, 2 или 3 евра, на што Николов одговори дека не му дал.
Заев го потсети Николов дека на снимката која е приложена како доказ, тој му посочува дека едно евро требало да даде за црквата, а за другито евро разговарале да не го донира во готово, туку да го даде преку градежен материјал, цигли, цемент и сл.
Тој рече дека за првото евро е точно, а за второто негираше дека разговарале како да го донира преку градежен материјал.
Сведокот појасни дека идејата со градежните материјали била на неговиот син, а не на обвинетиот.
Заев, исто така го потсети Николов и на нивниот последен телефонски разговор и го праша дали е вистина дека му рекол: Како не ти е срам со месеци, па и години да ме местиш. Имаш внуци, дедо си, не ли ти е срам? Дали некогаш си имал проблем со мене или моето семејство? Зошто по секоја цена се обидуваш да ме наместиш, го праша Заев.
Тој посочи и дека му рекол да го плати милионот и дека бил стар човек, па не му чини тоа што го прави.
Заев го праша и дали е точно дека од 2008 до 2013 се воделе истраги против него, па сега неговото сведочење е поврзано со истрагите, на што Николов потврди дека имало истраги, ама како што кажа биле отфрлени.
Судијката Добрила Кацарска која е дел од судечкиот совет во еден момент го праша Николов за средбите со Заев. Тој призна дека го наведувал Заев на одговорите што се дел од материјалите од ПИМ и дека снимката од ПИ мерките што била прикажана на телевизија не била целосна.
-Откако ја имав опремата од МВР јас кога ќе одев кај градоначалникот го терав да го каже она што го има на снимката, рече Иван Николов одговарајќи на прашање на судијката Кацарска. Судијката во еден момент додека се обидуваше да добие одговор до сведокот на некои прашања му рече: „Не ми одговарајте како добро да сте ги научиле одговорите“.