На продолжението на рочиштето за „Поткуп“, каде премиерот Зоран Заев е обвинет за барање мито од струмичкиот бнизнисмен Иван Николов, во замена за давање на земјиште под закуп, сведокот Николов одговарајќи на прашања на адвокатот на Заев Филип Медарски рече дека на 19 декември 2013 година кога го пријавувал случајот во МВР, се видел со тогашниот директор на БЈБ Митко Чавков.
Како што раскажа Николов, додека се движел низ ходник во МВР со две лица Жарко и Влатко, за кои не кажа што функција имале, дошло до случајна средба со Чавков. Како што рече, се подотворила една врата и внатре бил Чавков кој му се обратил со зборовите: „Иво, што тука?“
Тој, како што рече, не му одговорил ништо, по што Чавков им се обратил на двете лица, велејќи им дека Николов е „најголемниот работник во Струмица“.
Николов денеска тврдеше дека тоа бил целиот разговор што го слушнал меѓу Чавков и двете лица и дека претходно немал средби со тогашниот директор на БЈБ , но го познавал.
Потоа Николов се потсети на еден случај од 1993 година кога во неговиот дом имало разбојништво, а Чавков тогаш бил инспектор во Струмица.
Прашан од Медарски дали, меѓу 19 декември до денес имало некаква средба со Чавков, Николов рече дека побарал и имал средба со синот на Чавков кој се занимавал со гардежништво да му даде понуда за проект, а на една од средбите тој дошол со својот татко, односно со Митко Чавков. Тоа било во 2017 година, но не можеше точно да се сети кој месец. Прво наведе дека било во ноември, а потоа рече дека не можел да се сети на месецот, но дека годината била 2017.
Инаку, Медарски му предочи на Николов што кажал во записникот даден во Обвинителството на декември 2013 година, односно дека во него стои дека кажал дека му биле побарани по три евра за квадрат, сите за црквата, а не какошто Николов тврдеше денеска пред судот- дека се работи за едно евро за црквата, едно за Заев и едно за партијата.
Николов потврди дека потписот на конкретната страница каде е овој дел од записникот е негов, но тврди дека не кажал тогаш така.
Сведокот не одговори конкрентно ниту на прашањето дали на средбите со обвинителот во Струмица, за време на разговорите присуствувале и две лица од МВР кои тој ги споменува дека доаѓале.
Николов потврди дека во 2014 година бил повикан во ОЈО за гонење организиран криминал да даде уште еден исказ, по што Медарски го праша дали му било дадено да потпише веќе изготвен записник или прво дал нов исказ па потоа потпишал записник. Одговорот на ова прашање Николов треба да го даде по паузата од 10 минути што ја даде судијата поради некој друг предмет.
Претходно судот одлучи денеска да не биде пуштена целосната снимка од ПИМ, се додека Основното јавно обвинителство не добие писмена одлука од судот. Обвинителството побарало одлуката за објавување на снимката да ја добие на писмено, бидејќи ќе се жали на повисок суд.
Причина за тоа е затоа што станува збор за ПИ мерки и заради заштита на сведокот.
Одбраната прво побара таа да ја слушне снимката за да може подготвена да го испрашува сведокот, но барањето беше повлечено откако вториот адвокат на обвинетиот Зоран Заев кажа дека тој веќе ја имал слушнато целосната снимка.