„Доцна вечерва би сакал да ја соопштам и оваа позитивна вест директно од овде, од Берлин. Со мојот колега, министерот за земјоделие на Република Бугарија, Иван Иванов, договоривме дека од Република Бугарија ќе обезбедиме дополнителни количества на пченица. Заедно со нашите соседи на ваков начин градиме вистинско добрососедство и сплотени многу полесно ќе ја пребродиме и ќе се справиме со постоечката криза”, објави вечерва на својот Фејсбук профил министерот за земјоделство, шумарство и водостопанство Љупчо Николовски.
Министерот се наоѓа во Германија каде што на покана на германскиот министер за храна и земјоделство Џем Оздемир учествуваше на конференција во Берлин во рамките на Берлинскиот процес а тема е земјоделска политика меѓу Германија и Западен Балкан.
Министерот не соопшти за колкави количини пченица станува збор. Минатиот месец беше постигнат договор и со Србија да ја изземе Македонија од забраната за извоз на пченица и други стратешки прехранбени суровини. Забраната ја воведе државното раководство на Србија откако регионот и Европа се соочија со опасност од недостиг на пченица и други житни култури како последица од намалениот увоз од Русија и Украина. Министерот Николовски беше на средби во Белград од каде испрати порака до македонската јавност дека е постигнат договор со Србија да не го прекине извозот на пченица кон Северна Македонија.
Северна Македонија увезува 90 отсто од потребите од пченица и брашно од соседна Србија. Минатата година од Србија увезовме 67.000 тони пченица и 33.000 тони брашно.
Според Државниот завод за статистика во државата има нешто над 517 илјади хектари обработлива површина, но повеќе една третина не се обработува.
Македонското министерство за земјоделство донесе „Национален план за производство на храна“ со кој се предвидува државна поддршка на поледелските култури за пролетна и есенска сеидба, програма за распределба на земјоделско земјиште за производство на житни култури, интервентен фонд, како и дополнителни мерки преку донесување Стратегија за производство на храна и стратешки култури во 2022 година. (С.К.)
