Членот на Извршниот одбор на СДСМ Љупчо Николовски на денешната прес конференција побара итно да бидат исплатени субвенциите за земјоделците.
– Министерот Цветков прво се оправдуваше дека требало да се направат измени на законите. Откако стана јасно дека тоа не поминува, сега се оправдува со оставката на директорот на Платежната агенција, рече Николовски.
Тој праша зошто субвенциите не се исплатени како што е законски во текот на 2016-та, календарска година, како и стотици милиони евра останати субвенции од претходните години.
Според Николовски, со давањето на мандатот, како што му наложува Уставот, Иванов ќе овозможи да се спроведе тоа што стои во Програмата на новата реформска Влада на граѓаните: редовни согласно нов календар субвенции и зголемени на 160 милиони.
– Вистинското решение и излез од кризата е сепак Ѓорге Иванов веднаш да го даде мандатот на претседателот на СДСМ, Зоран Заев за формирање на новата демократска и реформска Влада. Не да бега од државата и да ги остава на цедило и земјоделците и цела Македонија, само за да му помогне на Груевски во заштита на криминалните и продолжување на оваа криза, рече Николовски.