Пратеникот од СДСМ Љупчо Николовски денеска предупреди дека одолговлекувањето на дебатата во Собранието со реплики и контрареплики е на директна штета на земјоделците, кои како што рече не го добиле субвенциите за ланската, но и за неколку претходни години.
– Итно мора да се овозможи формирање на новата демократска и реформска Влада којашто ќе го реши проблемот со исплатата на субвенциите на земјоделците. Егзистенцијата на илјадници земјоделци е сериозно загрозена затоа што несериозни кадри на ВМРО-ДПМНЕ и коалицијата ги узурпираат иинституциите и си ја префрлуваат одговорноста а ги користат процедурите како изговор, за да не им ги дадат субвенциите на луѓето коишто го имаат тоа заслужено, субвенции што им следуваат по закон, рече Николовски.
Николовски на прес конференцијата во Собранието потсети дека досега се сменија тројца директори на Платежна агенција, но исплатата на субвенциите не е започната.
-В.д. директорот на Платежната агенција, Игор Златков изјави дека има потпишано налози за исплата и дека субвенциите ќе бидат исплатени. Министерството за финансии, пак, известува дека немаат добиено комплетна документација со налози за да се изврши исплата, којашто ќе зависела од состојбата на трезорот и од тоа дали има или не пари во Буџетот, рече Николовски, додавајќи дека ова e безобразно поигрување со маката на земјоделците коишто трпат за леб.
Тој промовираше и дел од програмата на новата влада, според кој земјоделците ќе добиваат и зголемени субвенции: 30% повеќе за секое ново грло и 20% повеќе за секој нов хектар, потоа зголемени субвенции и за нафта, односно воведување и поевтината земјоделска, или зелена нафта.
– Земјоделците кои ги исполнуваат условите за паушално оданочување ќе беа ослободени од плаќање данок. Доцнат и реформите за младите фармери кои си заминуваат од земјава секој ден. Тие ќе добиваа државна поддршка при купување на прво стадо, ќе имаа зголемени субвенции и ќе беа ослободени од закуп на државно земјоделско земјиште и тоа можеби ќе ги предомислеше да не го напуштат семејството и да не го бараат излезот надвор од Македонија. Ова се само дел од мерките со што новата реформска Влада можеше веќе да им помогне на земјоделците, рече Николовски.