Претседателката на Европската комисија, Урсула фон дер Лајен, изрази очекување дека земјава ќе го продолжи патот кон членството во ЕУ отворајќи го кластерот Фундаментални вредности, колку што е можно поскоро, но потсети дека за тоа се потребни уставните измени за кои, како што кажа, државава се согласила дека ќе бидат усвоени.
Дестан Јонузи / Фронтлајн.мк
За разлика од посетата на Тирана, каде претседателката на Европската комисија, Урсула фон дер Лајен го пофали визионерството на албанскиот премиер Еди Рама, во Скопје таа им порача на Мицкоски и Владата да ги спроведе уставните измени за земјава непречено да продолжи по патот кон ЕУ.
Извршниот директор на ЕВРОТИНК, Димитар Николовски, во изјава за „Фронтлајн“ вели дека пораките на Урсула фон дер Лајен значат статус-кво и уште поголем притисок за владата да ги прифати уставните измени.
– Ова значи статус кво и уште поголем притисок за владата да ги прифати уставните измени или да предложи алтернатива за членството во ЕУ. Евентуално, да се влезе во неизвесна иднина и да се чекаат некои поповолни времиња и распоред на силите во ЕУ, вели Николовски.
Претседателката на Европската комисија, Урсула фон дер Лајен, изрази очекување дека земјава ќе го продолжи патот кон членството во ЕУ отворајќи го кластерот Фундаментални вредности, колку што е можно поскоро, но потсети дека за тоа се потребни уставните измени за кои, како што кажа, државава се согласила дека ќе бидат усвоени.
– Ние имаме јасна цел, а тоа е да се отвори кластерот фундаментални вредности што е можно поскоро. Речиси сме таму, треба да поминат уставните измени на кои вашата држава се согласи дека ќе ги направи. Со заеднички дијалог се надевам дека сите политички сили ќе се здружат во земјата и ќе направат потребните заеднички чекори за напредок и уверена сум исто како и вас дека можеме да ги надминеме пречките кои постојат, рече Урсула Фон дер Лајен на заедничката прес-конференција со премиерот Христијан Мицкоски.
Премиерот Христијан Мицкоски од друга страна изјави дека ЕУ треба да помогне да се најде начин за нашиот интегративен пат уважувајќи ги ставовите во иднина да не се соочиме со барања кои се во спротивност.
– Очекуваме Европската унија заедно со нас да помогне да се најде начини како да го продолжиме нашиот европски интегративен пат истовремено уважувајќи ги легитимните ставови на нашите граѓани дека во иднина нема да се соочуваме со барања кои се во спротивност со идеите и вредностите на кои почива самата Европска унија, вели Мицкоски.
Според министерот за европски прашања и главен преговарач со Европската унија Орхан Муртезани официјален Брисел не гледа со голем оптимизам на предлогот за уставни измени со одложено дејство, но, не го отфрла целосно и оти во Владата веќе се водат интерни разговори за изнаоѓање на нови решенија како да се продолжат преговорите.
„Досега немаме финален предлог, меѓутоа и да имаме таков нема да брзаме да го објавиме пред да бидат завршени изборите во соседна Бугарија“ изјави неодамна Муртезани.
Ова е прва посета на претседателката на Европската Комисија Урсула Фон дер Лајен на регионот откако на 18 јули со големо мнозинство гласови во Европскиот парламент го освои вториот петгодишен мандат.
Нејзината посета на Западен Балкан доаѓа во време кога проширување е високо на агендата на Европската Унија, и откако, пред само една недела Албанија го отвори и првиот кластер од преговорите со Унијата. Со тој потег, Тирана се одвои од Скопје и доби пол позицијата во „маратонот “ на евроинтегративниот пат.
Текстот е сопственост на Фронтлајн