По пауза од три години денес во Брисел се одржа двочасовен разговор помеѓу Грција, Македонија и посредникот во спорот со името Метју Нимиц. Следните средби се најавени за јануари, февруари и март, во Њујорк, Виена или Брисел во просториите на Обединетите Нации (ОН).
Според Нимиц, разговорот помеѓу македонскиот амбасадор во САД Васко Наумовски и грчкиот дипломат Адемантиос Василакис поминал во далеку подобра клима, без нервоза каква што постоела во текот на некои поранешни средби и со очигледен елан од Скопје и Атина спорот со името да се реши во текот на наредните месеци.
“Атмосферата денес беше далеку подобра. Кај двете страни има показатели дека треба да направиме интензивен напор за решавање на ова прашање кое постои одамна”, изјави Нимиц.
“Не дадов предлог денес но двете страни беа добро подготвени, се слушаа едни со други и имаше разбирање помеѓу нив за нивните позиции а имаше и желба да се најде решение. Досега не сме имале ваков поттик, двајцата министери не притискаат да направиме интензивен напор. И тоа денес и го направивме. Се надевам дека тоа ќе донесе решение за спорот”, вели посредникот.
Тој додаде дека нема ниту рок ниту датум до кој треба да се најде решение но верува дека има расположение и добра волја па така, според Нимиц, во наредните месеци и следната година спорот може и треба да се реши:
“А јас сум тој што треба да турне. По повеќе од 20 години без решение, уште нови 10 или 20 години разговори не би биле од помош.”
Нимиц уверува дека добрата клима на разговорите доаѓа од Атина и Скопје, помеѓу двете влади има убав дијалог и отсуство на нервоза.
“Двете страни се слушаа една со друга и разговараа помеѓу себе и имаше конструктивен тон кој ме тера да мислам дека има доволно флексибилност кај страните да се најде решение”, подвлече посредникот.
Тој додаде дека денес немало предлози за решение но денес било разговарано за повеќе детали што ги носи овој спор.
За македонската Влада, вели Нимиц, ова прашање има висок приоритет и “тие се чини се решени да излезат од ќорсокакот со Грција” и да тргнат во евро-атлантска интеграција.
Нимиц рече дека во Атина има иста таква волја:
“Во Атина Владата, и министерот и премиерот, дадоа изјави што укажуваат дека сакаат да го решат проблемот и очигледно има желба за решение.”
Решението, вели Нимиц, води во подобра безбедност во регионот, особено во денешната комплексна меѓународна ситуација. За двете земји станува јасно дека е време да се реши проблемот.
За Нимиц нема волшебно име кое одеднаш ќе излезе од шапката и ќе го реши проблемот:
“Јас во тоа не верувам. Сите прашања и можности се разговарани многу пати и сега треба да се најде решение а тоа се прави со волја и добра дипломатија.”