На средба во Министерството за одбрана со првите луѓе на Тирана и на Драч се изнесени најновите податоци за штетите од земјотресот што вчера попладне ја Албанија. Министерката Олта Џачка, посочи дека главно регистрирана е само материјална штета.
„За среќа нема жртви. Застрашувачки и небезбеден момент. Ќе дадеме се од себе за да ги сместиме погодените. Ќе направиме добра работа сите ние за подобро информирање и со цел да не ја пропуштиме потребната грижа. Што побрзо ќе формираме групи за проценка за да се обезбеди секој дека ќе биде обесштетен“, рече Џачка.
Префектот на Тирана, Сузана Јахолари информираше за сите преземени активности, формирање центри за сместување, поставување шатори, распределба на ќебиња, вода и потребна здравствена услуга.
„Моментално се работи на теренско евидентирање на оштетените објекти. Оштетени се 244 куќи и 20 станбени згради. Евидентирањето продолжува“, рече Јахолари.
Според нејзиниот колега од Драч, Роланд Насто како оштетени досега се регистрирани 188 куќи, 9 станбени згради и две училишта. Од 56 лица кои побарале лекарска помош 21 биле со скршеници.
Премиерот Еди Рама откако упати критики до Насто за лошото менаџирање на ситуацијата, му наложи да ги отвори вратите на градскиот стадион за да може да се постават шатори и да се сместат дел од жителите. Владата веќе отвори неколку пунктови во двата града на кои се дели храна, вода и друга помош на најзагрозените. Министерството за образование и наука соопшти дека утре наставата продолжува нормално, бидејќи не се регистрирани поголеми оштетувања врз училишните објекти.