Стеван Јоветиќ е нов член на Монако кој, судејќи по фотографиите што ги преплавија социјалните мрежи, е ангажиран како замена за Килијан Мбапе. На тоа упатува дресот со број 10 што досега беше сопственост на 18 годишниот фудбалер што е мета на најголемите европски клубови. Се шпекулира дека трансферот на Црногорец од Интер во актуелниот шампион на Франција ќе тежи 13 милиони евра.
Можноста за заминување на Мбапе од „Луј Втори“, и тоа уште во наредните 24 часа, го потврди и тренерот Леонардо Жардим. Напаѓачот, според ТВ „Скај“, се сели во Париз како позајмен фудбалер во ПСЖ со тоа што „светвите“ се обврзале да го откупат неговиот договор од Монако во текот на наредното лето за сума од 180 милиони евра.
Договорот, се вели, сè уште не е потпишан, но притоа се нагласува дека во зделката меѓу двата клуба нема да биде вклучен друг играч. Екипата на ПСЖ веќе го ангажира Нејмар за 222 милиона евра и ќе може да да го плати и Мбапе само доколку работи во рамки на финансискиот фер-плеј во кој се истакнува дека клубовите не може да потрошат повеќе пари одошто заработиле.
Шпанскиот весник „Марка“ објави дека Реал Мадрид понудил 150 милиони евра за Мбапе и уште 30 милиони евра во вид на бонуси што од „Луј Втори“ го негираа тоа.
За услугите на Мбапе , покрај „кралевите“, се загреани уште Барселона, Ливерпул, Арсенал и Манчестер сити и ако се суди по написите во дел од медиумите, напаѓачот на „кнезовите“ ќе смени средина, но не и фудбалска сцена и ќе остане во француската Лига 1 како дополнение на страшно моќната офанзивна линија на ПСЖ.