Масовни сајбер-напади се случуваа вчера доцна во денот, а компании од целиот свет беа погодени. Хакерите најсилно удриле во Украина, каде што биле зафатени банките и аеродромот во Киев, но исто така проблем пријавија и Франција, Данска и САД.
Оштета пријави и британската рекламна агенција ВПП, како и руски и дански компании, а воедно и украинската Влада.
Главниот аеродром во Киев беше цел на т.н. „спам“, што значи дека мрежата е нападната со огромно количество информации заради попречување на серверите и компјутерите.
Слични напади во Русија пријавија компаниите Роснефт, Башнефт, Марс, Нивеа, Мондељез интернешнел, кои, како што велат агенциите, се погодени со вирусот „Петја“.
Напаѓачите бараат откуп од 300 американски долари во биткоини.
Биткоинот е криптовалута, создадена со цел да биде многу тешка за следење на корисниците што ја користат. Цената на еден биткоин на сајбер-пазарот во моментов изнесува околу 2.500 долари.
Швајцарскиот центар за извештаи и анализи соопшти дека вирусот „Петја“, кој од жртвите бара откуп за враќање на информациите, погодил компании во Украина, Русија, Англија и Индија.
„Петја“ вирусот е поинаков од вообичаените „ренсомвер“ вируси што се користат за напади во кои од корисниците се бара откуп за да се врати пристапот до фајловите.
Овој вирус ги заклучува фајловите еден по еден, користи пониски структури на хард дискот за да го заклучи целиот систем.